2020-01-21
Belarusda 20 Yanvar faciəsinin ildönümü ilə bağlı silsilə anım tədbirləri keçirilir

Azərbaycanın Belarusdakı səfirliyi tərəfindən 20 Yanvar faciəsinin 30-cu ildönümü ilə bağlı ölkə üzrə silsilə anım tədbirləri keçirilir. Səfirlikdən AZƏRTAC-a bildiriblər ki, yanvarın 17-də Babruysk və yanvarın 19-da Qomel şəhərlərində Azərbaycan İcmaları Konqresinin nümayəndələri ilə birlikdə səfirliyin təşkilatçılığı ilə keçirilən anım tədbirlərinin açılışında Azərbaycan Respublikasının himni səsləndirilib və 20 Yanvar şəhidlərinin xatirəsi bir dəqiqəlik sükutla yad olunub.

Tədbirlərdə çıxış edən səfir Lətif Qəndilov bildirib ki, 1990-cı il yanvar ayının 19-dan 20-nə keçən gecə sovet ordusu tərəfindən Azərbaycan xalqına qarşı tarixin ən böyük cinayəti törədilib. Yüzlərlə əliyalın mülki şəxsin öldürülməsi, yaralanması və həbs olunması Mixail Qorbaçov və onun erməni əlaltıları tərəfindən Azərbaycan xalqına qarşı yönəlmiş cinayətdir.

Səfir 20 Yanvar hadisələrini Azərbaycan xalqının üzləşdiyi siyasi haqsızlıqlara qarşı yaranmış milli azadlıq hərəkatının qan içində susdurulması kimi qiymətləndirib. Bildirib ki, törədilən vəhşiliklərə baxmayaraq, xalqımızın müstəqillik ruhu və ədalət istəyi sınmayıb. Həmin dövrdə dövlətçiliyimizin olmaması xalqımızın qanının böyük miqyasda tökülməsinə səbəb olub. O dövrdə yalnız siyasi repressiyaya və təcridə məruz qalan Azərbaycan xalqının ümummilli lideri Heydər Əliyev Moskvada ölkəmizdə törədilən müsibətlərlə bağlı bəyanatla çıxış edib və bütün dünya xalqımıza qarşı törədilmiş cinayətlər barədə onun dilindən eşidib. Məhz buna görə də müstəqil dövlətimizi qurmağımız ötən müddətin ən böyük uğurlu hadisəsidir. Bugünkü reallıqlar isə dövlətimizin və onun başçısı ətrafında möhkəm və sıx birləşməyimizi tələb edir və xalqımız dövlətçiliyimizə uzanan əlləri sındırıb atmağa daim hazır olmalıdır. Unutqanlıqla biz hər şeyi itirə bilərik. Yenidən belə hadisələrin təkrarlanmaması üçün keçmiş faciələri daim xatırlamalıyıq. Azərbaycan xalqı dövlət müstəqilliyinin bərpasında canlarını fəda edən şəhidlərimizin əziz xatirəsini hər zaman uca tutacaq.

Sonda iştirakçılar 20 Yanvar faciəsi ilə bağlı filmə baxıb və faciəni əks etdirən fotosərgi ilə tanış olublar.

Bu gün isə Minsk və ətrafında yerləşən bölgələrdə yaşayan diaspor nümayəndələrinin iştirakı ilə səfirlikdə 20 Yanvar faciəsinin 30-cu ildönümünə həsr olunmuş daha bir tədbir keçiriləcək.

növbəti xəbər əvvəlki xəbər